Era centrau de crompes deth mon locau de Catalonha - Aran

Un an dempús dera entrada en vigor dera Lei de contractes deth sector public (LCSP) auem de continuar auançant enes dus fronts: un prumèr, apregondir ena reflexion d’un seguit d’aspèctes que dia a dia son presenti ena problematica quotidiana des responsables e gestors juridics, tecnics e administratius des entitats locaus en matèria de contractacion; e en segon lòc, continuar damb era difusion des bones practiques, ja adaptades ena naua LCSP, damb valor de replicabilitat e utilizables per un ample conjunt des ens gestors.

Atau donc, se hè complètament necesssari, mès enlà de conéisher e seguir encarant es naues controvèrsies qu'an arribat ena agenda contractuau damb era naua legislacion, d’encarar es objectius estrategics, que promò era naua LCSP, damb er afavoriment des politiques sociaus, mèdiambientaus, de genre,... damb un recuelh d'experiéncies ja contrastades, e auançar ena utilizacion des instruments tecnologics mès enlà deth factor de reduccion de còst e temps.

Per tot açò, es sessions son damb er objectiu de realizar ua metuda en comun, e analisar atau era naua Lei de contractes tà debàter tematicament es aspèctes qu’auem considerat mès relevants, damb era finalitat d’arténher ua contractacion agila, efectiva, transparenta e adequada ara legalitat. Es aspèctes que tractaram son:

-  Era tramitacion des procediments des contractes menors, majoritaris quantitativament ena administracion locau. Quina regulacion auríem d’utilizar?. Com s’interprèten es restriccions dera LCSP?. Es menors en marc des procediments electronics des expedients supersimplificats e abreujats, ena cèrca d’actuacions administratives rapides e transparentes. Era participacion des PIME deth territòri ena contractacion menora.

- Afrontar es rèptes dera participacion des licitadors ena aplicacion des critèris d'admission, solvéncia, tant era economica e tecnica, atau com es elements de garantia ena seleccion des contractistes, tà arténher ua major concurréncia.

 - Apregondir ena seleccion e adjudicacion, en especiau es critèris e soscritèris d'adjudicacion, e de manèra especiau, analisar eth nau marc dera experiéncia professionau coma requisit de solvéncia, condicion especiau d’execucion o critèri d'adjudicacion.

- Debàter sus era implementacion, aplicacion e seguiment des clausules sociaus e mèdiambientaus, etiques e d'innovacion coma condicion especiau d'execucion, atau com identificar es qu’agen estat utilizades de forma efectiva.

En aguest sens, enes jornades vos aufriram iniciauments diferenti posicionaments tecnico juridics de diferenti aspèctes controvertits dera contractacion publica. De forma especiau, era doctrina dera naua lei per part des diuèrses juntes consultives de contractacion administrativa, e tribunaus de contractes deth sector public, atau coma ua bibliografia de naues lectures recomanades pes ponents dera jornada.

Per ua auta part, coma objectiu addicionau e de caractèr generau, aguestes jornades pretenen tanben facilitar eth contacte e trabalh en comun de totes aqueres persones que compartissen es foncions especifiques, encara que diuèrses, ena gestion de contractacion. Un punt de contacte e trobada des persones que trabalham ena contractacion publica locau.